Mar 3 | BOJ | STEP | Olo yori bati bei Yesus a Juda naŋgo Qotei tal miligiq gilsiqa tamo bei baŋ qandamyej qaji a di sonaq unej.

Mark 3

Yesus na yori bati qa tamo bei baŋ qandamyej qaji di boletej

1 Olo yori bati bei Yesus a Juda naŋgo Qotei tal miligiq gilsiqa tamo bei baŋ qandamyej qaji a di sonaq unej. 2 Onaqa Farisi naŋgi Yesus koqyoqneb. Naŋgi are qaleb, “Yesus a yori bati qa tamo di boletqas kio? Yimqa minjqom, ‘Ni na yori bati grotonum.’” Deqa naŋgi Yesus koqyoqneb. 3 Onaqa Yesus a tamo baŋ qandamyej qaji di minjej, “Ni tigelosim au.” 4 Degsi minjnaqa tigelosiqa Yesus aqa areq gileqnaqa Yesus na Farisi naŋgi nenemnjrej, “Iga yori bati qa kumbra bole yqom kio kumbra uge yqom kio? Tamo bei a padalqa laqnimqa iga na aqaryaiyonam a bole sqas di kere kio iga na uratonam a padalqas di kere kio? Dal anjam a kiersi marqo? Niŋgi merbiye.” Onaqa Farisi naŋgi kamba olo anjam bei Yesus minjosai. Naŋgi mequmesoqneb. 5 Onaqa Yesus a naŋgi koqnjrej. Naŋgi Yesus aqa anjam quqwajqa are sosai deqa a naŋgi qa are minjiŋ oqej. Osiqa tamo baŋ qandamyej qaji di minjej, “Ni ino baŋ waiy.” Degsi minjnaqa aqa baŋ waiyonaq boleej. 6 Onaqa Farisi naŋgi Yesus aqa maŋwa di unsibqa naŋgi a qa minjiŋ oqetnjrnaqa Qotei tal uratosib oqedosib Herot aqa wau tamo naŋgi ti koba na koroosib naŋgi gam kiersib Yesus qalib moiqajqa deqa qairoqneb.

Tamo uŋgasari gargekoba naŋgi Yesus dauryosib alile aisib aqa areq di korooqneb

7 Onaqa Yesus aqa aŋgro naŋgi ti tigelosib tamo uŋgasari kalil naŋgi uratnjrsib alile aisib di sonabqa tamo uŋgasari tulaŋ gargekoba naŋgi anjam endegsib queb, “Yesus a maŋwa tulaŋ gargekoba yeleŋeqnu.” Degsib qusib deqa Yesus dauryosib alile aisib aqa areq di korooqneb. Galili sawa naŋgi ti Judia sawa naŋgi ti Jerusalem qure naŋgi ti Idumia sawa naŋgi ti qure kalil Jordan ya taqal beiq di soqneb qaji naŋgi ti Tair qure ti Saidon qure ti naŋgi kalil beleŋosib Yesus aqa areq di korooqneb. 9 Onaqa Yesus a na aqa aŋgro naŋgi endegsi minjrej, “Qobuŋ bei atib soqnem. Tamo uŋgasari naŋgi bosib e tulaŋ jujuŋbibqa e qobuŋ gogetosiy di awoqai.” Onaqa aqa aŋgro naŋgi qobuŋ bei atnab soqnej. 10 Yesus a nami tamo uŋgasari tulaŋ gargekoba naŋgi boletnjroqnej. Deqa tamo ma ti kalil naŋgi aqa areq boqnibqa a na naŋgo jejamu ojetnjrimqa naŋgi boleqajqa deqa marsib bosib jujuŋyoqneb. 11 Tamo mondor uge uge na ojeleŋo qaji naŋgi dego Yesus aqa areq boqneb. Boqnsibqa mondor uge naŋgi na Yesus unoqnsib aqa siŋgaq dia siŋga pulutoqnsib maoqnsib minjoqneb, “Ni Qotei aqa Ŋiri.” 12 Degsib minjeqnabqa Yesus a na naŋgi siŋgila na saidnjroqnej, “Niŋgi ijo ñam ubtsib maraib.”

Yesus na tamo 12-pela naŋgi giltnjrej

13 Onaqa Yesus a dena walwelosiqa manaq oqej. A endegsi are qalej, “E na ijo aŋgro qudei giltnjritqa naŋgi e koba na laqnsibqa ijo wau ojoqnqab.” A degsi are qalsiqa manaq oqsiq dia aqa aŋgro qudei naŋgi metnjrnaqa aqa areq bonabqa naŋgo ambleq dena aŋgro 12-pela giltnjrej. Naŋgi a ombla sqajqa deqa ti a na naŋgi qariŋnjrimqa naŋgi aqa anjam mare mare laqnsib mondor uge uge naŋgi winjroqnqajqa deqa ti naŋgi giltnjrej. 16 Tamo 12-pela giltnjrej qaji naŋgo ñam agiende. Bei Saimon. Aqa ñam bei Yesus na Pita waiyej. 17 Bei Sebedi aqa ŋiri Jems naŋgi aqa was Jon wo. Naŋgo ñam bei Yesus na Boanerges wainjrej. Ñam di aqa damu, “Naŋgo anjam kola bul.” 18 Ariya Andru wo Filip wo. Bei Bartolomyu naŋgi Matyu wo. Bei Tomas. Bei Alfias aqa ŋiri Jems. Bei Tadius. Bei Saimon agi Rom naŋgi winjrqajqa maroqnej qaji. 19 Ariya bei Judas Iskariot agi Yesus osiqa jeu tamo naŋgo baŋq di atej qaji. Yesus aqa aŋgro 12-pela naŋgo ñam agide. Naŋgi aqa anjam mare mare laqajqa deqa giltnjrej.

Tamo qudei naŋgi maroqneb, “Yesus a Belsebul aqa siŋgila na mondor uge naŋgi winjreqnu.”

20 Ariya Yesus a na aqa aŋgro naŋgi joqsiqa olo manaq dena aisiqa aqa talq gilej. Gilsiq di sonaqa tamo uŋgasari tulaŋ gargekoba olo bosib aqa areq di korooqneb. Deqa aqa aŋgro naŋgi ti iŋgi uyqa bati saiqoji. 21 Onaqa Yesus aqa was naŋgi aqa aniqali koba na degsi qusibqa tigelosib Yesus oqajqa marsib Nasaret qure uratosib qure Yesus soqnej qaji deq gileb. Naŋgi maroqneb, “Yesus a nanariqo kio?”

22 Onaqa dal anjam qalie tamo qudei Jerusalem dena beb qaji naŋgi Yesus yomuiyosib maroqneb, “Mondor uge naŋgo gate koba Belsebul a Yesus aqa jejamuq di unu. Deqa siŋgila dena Yesus a na mondor uge naŋgi winjreqnu.” 23 Onaqa Yesus a naŋgi metnjrnaqa aqa areq bonabqa yawo anjam endegsi minjrej, “Satan na aqa segi mondor uge naŋgi kiersim winjrqas? Di keresai. 24 Tamo naŋgi qure qujaiq di unub qaji naŋgi segi poaiyelosib qotqab di naŋgi koba na geregere sqa keresai. 25 Tamo naŋgi tal qujaiq di unub qaji naŋgi segi poaiyelosib qotqab di naŋgi dego koba na geregere sqa keresai. 26 Dego kere Satan na aqa segi mondor uge naŋgi jeutnjrsim winjrqas di aqa siŋgila koboosim aqa wau uloŋqas.

27 “Tamo bei a tamo siŋgila koba bei aqa tal gogetosim aqa iŋgi iŋgi kalil bajiŋqa keresai. A mati tamo siŋgila di sil na tontim soqnimqa di aqa iŋgi iŋgi kalil bajiŋqas. Tontqasai di aqa iŋgi iŋgi bajiŋqa keresai.

28 “Niŋgi quiye. E bole merŋgwai. Tamo uŋgasari naŋgo une kalil Qotei na kobotetnjrqas. Tamo uŋgasari naŋgo misiliŋ anjam kalil dego Qotei na kobotetnjrqas. 29 Ariya tamo a Qotei aqa Mondor Bole misiliŋyqas une di Qotei na kobotqasai. Une di tamo aqa jejamuq di gaigai sqas.” 30 Yesus a na dal anjam qalie tamo naŋgi anjam degsi minjrej. Di kiyaqa? Naŋgi maroqneb, “Yesus a mondor uge ti.”

Yesus aqa ai aqa was naŋgi tal qabe?

31 Onaqa Yesus aqa was naŋgi aqa aniqali ombla na Yesus qa ŋamosib bosib talq di iteb. Yesus a warum miligiq di sonaqa naŋgi oqeq di tigelosib tamo qudei minjreb, “Iga Yesus qa bonum. Deqa niŋgi a minjib endeq bem.” 32 Onaqa tamo uŋgasari Yesus aqa siŋgaq dia awesoqneb qaji naŋgi na Yesus minjeb, “Ino was naŋgi ino ai ombla na ni qa bonub agi oqeq di tigelejunub.” 33 Onaqa Yesus na kamba minjrej, “Ijo ai ijo was naŋgi tal qabe?” 34 Degsi minjrsiqa tamo uŋgasari aqa siŋgaq dia awesoqneb qaji naŋgi koqnjrsiqa minjrej, “Niŋgi segi ijo ai ijo was naŋgi. 35 Niŋgi quiye. Tamo a Qotei aqa areqalo daurysim sqas di a ijo was bole. A ijo jaja bole. A ijo ai bole.”